சுதந்திர கிண்ணம் யாருக்கு?

இந்தியா, இலங்கை, பங்களாதேஷ் ஆகிய 3 நாடுகள் இடையேயான 20 ஓவர் கிரிக்கெட் போட்டி யின் இறுதிப்போட்டி இன்று நடைபெறவுள்ளது.

இந்திய அணி 2 முறை பங்களாதேஷை வீழ்த்தி இருந்ததால் கோப்பையை வெல்ல முடியும் என்ற நம்பிக்கையில் உள்ளது. அதே நேரத்தில் பங்களாதேஷை சாதாரணமாக எடுத்துக் கொள்ள முடியாது. அந்த அணி இலங்கையை அதிர்ச்சிகரமாக வீழ்த்தி இருந்தது.

இந்திய அணியின் தவான் (188 ரன்) கேப்டன் ரோகித்சர்மா (117), மனிஷ் பாண்டே (106), ரெய்னா, தினேஷ் கார்த்திக் ஆகியோர் நல்ல நிலையில் உள்ளனர்.

பந்துவீச்சில் தமிழக வீரர் வாஷிங்டன் சுந்தர் மிகவும் நல்ல நிலையில் உள்ளார். சுழற்பந்து வீரரான அவர் 4 ஆட்டத்தில் 7 விக்கெட் கைப்பற்றி இந்த தொடரில் முதல் இடத்தில் உள்ளார்.

‌ஷர்துல் தாகூர் (6 விக்கெட்), ஜெய்தேவ் உனட்கட், யசுவேந்திர சாஹல் (தலா 5 விக்கெட்) ஆகியோரும் நல்ல நிலையில் இருக்கிறார்கள். தமிழகத்தை சேர்ந்த ஆல்ரவுண்டர் விஜய்சங்கர் அணிக்கு உதவிகரமாக இருந்து வருகிறார்.

பங்களாதேசத்துக்கு எதிராக விளையாடிய அனைத்து 20 ஓவரிலும் (7 ஆட்டம்) இந்தியா வெற்றி பெற்று இருக்கிறது.

இந்தியாவை அதிர்ச்சிகரமாக வீழ்த்தி கோப்பையை வெல்லும் ஆர்வத்தில் வங்காளதேசம் உள்ளது. இலங்கையை 2 தடவை வென்றதால் அந்த அணி இறுதிப்போட்டியில் மிகுந்த நம்பிக்கையுடன் விளையாடும்.

கேப்டன் சகீப்- அல்- ஹசன் அணிக்கு திரும்பி இருப்பது வங்காள தேசத்துக்கு கூடுதல் பலமே. அந்த அணியில் முஷ்பிகுர் ரகீம் (190 ரன்), தமிம் இக்பால் (134 ரன்), முஷ்டாபிசுர் ரகுமான் (6 விக்கெட்), மகமதுல்லா போன்ற சிறந்த வீரர்கள் உள்ளனர்.

இந்தியாவுக்கு எல்லா வகையிலும் வங்காளதேசம் ஈடுகொடுத்து போராடும் என்பதால்இன்றய இறுதிப்போட்டி விறுவிறுப்பாக இருக்கும். இரவு 7 மணிக்கு போட்டி தொடங்குகிறது.